సజీవ సమాధికి శతాధిక వృద్ధురాలు వినతి

కుటుంబ సభ్యుల వేధింపుల నుంచి విముక్తి పొందేందుకుగాను తాను సజీవ సమాధి అయ్యేందుకు అవకాశం కల్పించాలని విశాఖజిల్లా చోడవరం మండలం పిఎస్‌పేటకు చెందిన శతాధిక వృద్ధురాలు మజ్జి దేముడమ్మ (110) జిల్లా కలెక్టరుకు విన్నవించింది. దీంతో కలెక్టరు ఆదేశాల మేరకు చోడవరం తహశీల్దారు జి తాతబ్బాయి, ఎస్‌ఐ గఫూర్‌ ఆమె వద్దకెళ్లి వివరాలు తెలుసుకున్నారు. పిఎస్‌పేటకు చెందిన దేముడమ్మ భర్త బాపునాయుడు 40 ఏళ్ల క్రితం చనిపోయాడు. దీంతో ఆమె ఆస్తులన్నింటినీ ఆమె మనవడు మజ్జి రామకృష్ణ గతంలోనే స్వాధీనం చేసుకున్నాడు. ప్రస్తుతం ఆమె ఉంటున్న ఇంటిని కూడా కాజేసేందుకు ప్రయత్నిస్తున్నాడు. సూటిపోటి మాటలతో మానసికంగా హింసిస్తున్నాడు. ఆమె నివసిస్తున్న ఇంటికి విద్యుత్తును కూడా నిలిపేయించాడు. తన తల్లిదండ్రుల నుంచి సంక్రమించిన ఆస్తులను మిగతా కుటుంబ సభ్యులు కాజేశారని ఆమె కన్నీటి పర్యంతమయింది. దిక్కుతోచని స్థితిలో ఉన్న తనకు సజీవ సమాధికి అనుమతించాలని దేముడమ్మ కోరింది. ఇంటి ప్రాంగణంలో సమాధిని కూడా సిద్ధం చేసుకున్నానని ఆమె వారికి చూపింది. ఇదీ నేటి భారతం