ఉద్యమిస్తే పోయేదేమీ లేదు… బడులకు పడ్డ తాళాలు ఊడటం తప్ప!!

ఓ డజను రోజులపాటు తెలంగాణలో బడులకు వేసిన బలవంతపు తాళాలు 2011 అక్టోబరు 18 నుంచీ ఊడనున్నాయి. ఈ మేరకు తెలంగాణ ప్రాంత ప్రైవేటు పాఠశాలల యజమానుల సంఘం 17వ తేదీ సాయంత్రం ప్రకటించింది. వాస్తవానికి ఈ ప్రకటన రానున్న విషయాన్ని తెలుగిల్లు 15వ తేదీనే విశ్లేషించిన వైనం చదువరులకు విదితమే. ఏదయితేనేం బడులు తెరుచుకోవటం తల్లిదండ్రుల ఉద్యమ ఫలితమే. అందుకు తెలుగిల్లు తల్లిదండ్రులకు అభినందనలు తెలుపుతోంది. ఇదేదో తెలంగాణ వ్యతిరేక వ్యవహారం కాదు సుమా. ఉమ్మడిగా గొంతు విప్పితే వచ్చే లాభం ఏమిటో తెలియజెప్పేందుకే. ఈ విజయం మరిన్ని పోరాటాలకు దారి తీయాలని తెలుగిల్లు ఆశిస్తోంది. గ్యాస్‌ ధర పెరుగుదల, విద్యుత్తు భారాలు, నిరుద్యోగం, నిలిచిపోయిన నీటి సరఫరా, బడి మూత, పంతుళ్ల కొరత, రోడ్డుపై చెత్తాచెదారం, పన్నుల పెంపు, లంచాలు, అక్రమాలు ఇలా … ఇలా సమస్య ఏదయినా వీలయిన వాళ్లంతా ఉమ్మడిగా కదలాలి. ఒక్కటై గళం విప్పాలి. అప్పుడు విజయాలు ఒళ్లో వచ్చి వాలతాయి.